Èske se vre Leta Ayisyen Kraze CNE vre?

Popilasyon an ap mande kote CNE pase?

Nan mwa Septanm pase a, sou inisyativ ak enfliyans PM Gary Conille, pouvwa Egzekitif lan te deside pran yon dekrè pou elimine CNE kòm enstitisyon kap fonksyone nan peyi a. Nap raple popilasyon an, nan kad rapò ULCC sou dosye materyèl CNE ki vòlè, ki détoune, ki ankestre nan men gwo potanta isit, Ansyen Prezidan, ansyen PM, ansyen Minis, Senatè, Depite, patikilye, poun site ke sa, ki te nan pouvwa ak patikilye moun ki pròch pouvwa. Jij ki te sou dosye a te endekse Ex PM Gary Conille kòm Moun ki gen a wè ak dosye gaspiyaj, gagòt ki fèt sou materyèl CNE.

Fòk nou di ak popilasyon an, nom manb KPT yo pat nan vizè Jij ki te lanse manda rale mennen vini kont ansyen PM Gary Conille lan. Antan ke sitwayen, Mwen pap bliye prerogativ konstititisyonèl Pouvwa Egzekitif lan genyen, ki se asire bon fonksyoneman tout enstitisyon nan Peyi a. Desizyon pou Leta ta kraze yon Enstitisyon kap mal fonksyone, gen yon jan pou sa ta dwe fèt; kote Leta santral ak enstitisyon ki la pou sa, fè evalyasyon ak odit sou bwat sila, pou etabli prèv disfonksyoneman ak enprodiktivite enstitisyon sila, lè sa Leta kapab deside sou avni li.

Eskandal ki genyen nan dosye kraze CNE an, se pa ta dwe nan egzekite yon projè brip sou kou, sou kouvèti yon dekrè mano militari ki vyole dwa plis pase 1000 anplwaye ki nan 4 kwen peyi a, kap desèvi popilasyon Ayisyèn lan plis pase 26 Lane, pou yon otorite ki endekse pa Lajistis Ayisyèn, enfliyanse desizyon pou kraze CNE.

Desizyon pou kraze CNE a vyole Dwa tout anplwaye kap travay nan bwat sila a, moun ki gen responsablite pou okipe tèt yo ak fanmi yo, sa ki kreye ensètitid lakay yo sou avni fanmi yo. Se yon enjistis ak mechanste, pou yon otorite pa jennen, san etid ak evalyasyon bwat sila, deside mete fen nan sèvis li, pou kache dèyè do enpinite kap gangrennen peyi a.

Dekrè sila, pa kapab sèvi pretèks pou yon otorite ki endekse pa Lajistis vin kache anba kouvèti pouvwa, pou nye responsablite li fas ak Lajistis, nan dosye CNE a. Yon otorite ki konn dwa li ak devwa li, se regilarize, ranfòse ak akonpagnye tout enstitisyon kap mal fonksyone nan peyi a, pou enstitisyon sila kapab bay plis randman, epi vin pi efikas. Leta pa gen pou fè popilasyon li enjistis, Leta genyen pou travay pou amelyore kondisyon vi sosyal ak ekonomik li. Aprè plis pase 3 mwa san touche, anplwaye CNE yo pa resevwa 14 èm mwa, ni 3 mwa aryere ke yo poko touche, yo poko konnen kote bonis yo ye.

Anplwaye CNE yo ap mande Leta santral kap dirije pa KPT a, ki gen nan tèt li Lesly Voltaire ak PM Alix Didier Fils Aimé chèf gouvènman, pou peye anplwaye CNE yo 5 mwa dèt Leta dwe yo. An menm tan, REPANSE dosye CNE a pou revoke Dekrè selera sila. Nap signyale, Dekrè a te prevwa ke tout anplwaye CNE yo se sou responsablite MTPTC yo ye an atandan. Malgre Dekrè sila, CNE toujou rete byen vivan, CNE pa janm chome, anplwaye yo toujou kontinye ap travay pou popilasyon an.
Malerezman, malgre abi otorite yo fè sou anplwaye CNE yo, mwen pa tande Ofis Proteksyon Sitwayen (OPC) di anyen sou sa, mwen pa tande òganism Dwa Zimen yo di anyen sou vlyolans sistematik Leta fè sou ansanm sitwayen sa yo.

CNE se yon Sant Fòmasyon kap fòme jenès lan nan aprann pilote gro anjen lou yo, se yon zouti ki pròch popilasyon an, se yon rezèvwa teknisyen konpetan, enfatigab, ki toujou disponib nan kelkeswa sikonstans lan pou akonpagnye popilasyon an; zèv CNE, se temwanyaj popilasyon an, ki toujou di, se yon ekip solid kap travay, nan bon tan kou move tan, pou rekonstwi Ayiti.

Jistis pou Ayiti, Jistis pou anplwaye CNE yo ak popilasyon an!

  *J.M.109 POU AYITI*

        _12+12+24_